თვითმფრინავის კარი იკეტება და ბორტგამცილებელი გთხოვთ, ტელეფონი თვითმფრინავის რეჟიმზე (Airplane Mode) გადართოთ. ბევრი ამას უბრალოდ წესად აღიქვამს, ზოგს კი ჰგონია, რომ ეს ძველი მითია. სინამდვილეში, ამ მოთხოვნას რეალური მიზეზი აქვს, თუმცა არა ისეთი დრამატული, როგორც ხშირად ჰყვებიან.
რა არის თვითმფრინავის რეჟიმი
თვითმფრინავის რეჟიმი ტელეფონის, პლანშეტისა თუ ლეპტოპის ფუნქციაა, რომელიც ერთი ღილაკით თიშავს ყველა რადიოსიგნალს: მობილურ ქსელს (ზარებს, SMS-ს და მობილურ ინტერნეტს), Wi-Fi-სა და Bluetooth-ს. ტელეფონი კი ჩართული რჩება და შეგიძლიათ უყუროთ გადმოწერილ ფილმებს, მოუსმინოთ მუსიკას, წაიკითხოთ წიგნი, ითამაშოთ ოფლაინ თამაშები ან გადაიღოთ ფოტოები.
iPhone-ზე მას Control Center-ში ნახავთ, Android-ზე კი ეკრანის ზემოდან ჩამოსაწევ მენიუში. ორივეგან ის თვითმფრინავის ნიშნით არის აღნიშნული.
რატომ გთხოვენ თვითმფრინავის რეჟიმის ჩართვას
1. პილოტების რადიოკავშირი
ჩართული ტელეფონი გამუდმებით ეძებს მობილურ ანძას და ძლიერ სიგნალს აგზავნის. პილოტების ყურსასმენებში ამან შეიძლება გამოიწვიოს დამახასიათებელი ზუზუნი, ისეთივე, რასაც ზოგჯერ დინამიკთან ახლოს მდებარე ტელეფონი იწვევს. ერთი ტელეფონი პრობლემას არ ქმნის, მაგრამ ბორტზე ასობით მგზავრია. პილოტებისთვის კი, განსაკუთრებით ცუდ ამინდში აფრენისა და დაშვებისას, მეთვალყურეებთან მკაფიო კავშირი ძალიან მნიშვნელოვანია.
2. მიწის მობილური ქსელები
10 კილომეტრ სიმაღლეზე თქვენი ტელეფონი ერთდროულად ათეულობით ანძას “ხედავს” და ყველას უკავშირდება. ეს მიწაზე მობილური ქსელების მუშაობას აფერხებს, ამიტომ ფრენისას ჩვეულებრივი მობილური კავშირის გამოყენება ბევრ ქვეყანაში აკრძალულია.
3. სიფრთხილე
თანამედროვე თვითმფრინავები ელექტრომაგნიტური ჩარევისგან კარგად არის დაცული და ჯერ არცერთი ავიაკატასტროფა არ ყოფილა დადასტურებით ტელეფონთან დაკავშირებული. მიუხედავად ამისა, ავიაციაში ყველა მცირე რისკსაც კი ამცირებენ. ამიტომ ეს წესი ისევ მოქმედებს.
რა მოხდება, თუ თვითმფრინავის რეჟიმს არ ჩართავთ
თვითმფრინავი არ ჩამოვარდება და ფრენის დროს დავიწყებული ტელეფონის გამო არავინ დაგსჯით. მაგრამ:
- ტელეფონი სწრაფად დაჯდება. მაღლა სიგნალი არ არის და ტელეფონი გამუდმებით, სრული სიმძლავრით ეძებს ქსელს. რამდენიმესაათიანი ფრენის შემდეგ შეიძლება ბატარეის დიდი ნაწილი დაკარგოთ, დაშვებისას კი ტელეფონი ტაქსის გამოსაძახებლად ან ბილეთის საჩვენებლად დაგჭირდებათ.
- შეიძლება დიდი ანგარიში მოგივიდეთ. ზოგ თვითმფრინავზე ბორტზე მობილური ქსელია დამონტაჟებული. თუ ტელეფონი მას დაუკავშირდება, როუმინგის ძალიან ძვირი ტარიფით გადაიხდით.
- დაარღვევთ ეკიპაჟის მითითებას. ბორტგამცილებლის მითითების შესრულება კანონით ვალდებულებაა, უარის შემთხვევაში კი შეიძლება ჯარიმაც დაგეკისროთ.
შეიძლება თუ არა Wi-Fi-ისა და Bluetooth-ის გამოყენება ფრენისას
კი. ევროპაში 2014 წლიდან მგზავრებს ტელეფონის გამოყენება თვითმფრინავის რეჟიმში მთელი ფრენის განმავლობაში შეუძლიათ, მათ შორის აფრენისა და დაშვებისას. თვითმფრინავის რეჟიმის ჩართვის შემდეგ შეგიძლიათ ხელახლა ჩართოთ:
- Bluetooth, უსადენო ყურსასმენებისთვის ან სმარტ საათისთვის;
- Wi-Fi, თუ ავიაკომპანია ბორტზე ინტერნეტს სთავაზობს. ის ხშირად ფასიანია და თანამგზავრული ან სპეციალური მიწის ანძების მეშვეობით მუშაობს, ამიტომ მიწაზე არსებულ ინტერნეტზე ნელია.
ზოგ ავიაკომპანიაში წესები შეიძლება განსხვავდებოდეს, ამიტომ ყოველთვის მოუსმინეთ ეკიპაჟის ინსტრუქციას.
როგორ მოვამზადოთ ტელეფონი ფრენისთვის
- გადმოწერეთ გასართობი წინასწარ: სერიალები, ფილმები, პოდკასტები, მუსიკა და წიგნები. Netflix, Spotify, YouTube Premium და სხვა სერვისები ოფლაინ რეჟიმს გვთავაზობენ.
- გადმოწერეთ ჩასვლის ქალაქის რუკა Google Maps-ში ან Maps.me-ში, რომ დაშვების შემდეგ ინტერნეტის გარეშეც იპოვოთ გზა.
- შეინახეთ ჩასხდომის ბილეთი და ჯავშნები ტელეფონში ან ეკრანის ანაბეჭდად.
- დატენეთ ტელეფონი და თან იქონიეთ პაუერბანკი. გახსოვდეთ, პაუერბანკი მხოლოდ ხელბარგში შეიძლება. დაწვრილებით: რა წესები მოქმედებს ხელბარგში ელექტრონიკისთვის.
ხშირად დასმული კითხვები
შეიძლება თუ არა ფრენისას ზარის განხორციელება?
ჩვეულებრივი მობილური ზარი ფრენისას აკრძალულია. ზოგ ავიაკომპანიაში ბორტზე Wi-Fi-ით შეტყობინებების გაგზავნა შეგიძლიათ, ხმოვანი ზარები კი, როგორც წესი, მაინც შეზღუდულია, რომ სხვა მგზავრებს ხელი არ შეეშალოთ.
ფოტოების გადაღება შეიძლება თვითმფრინავის რეჟიმში?
კი, კამერა ჩვეულებრივ მუშაობს. უბრალოდ, ეკიპაჟისა და სხვა მგზავრების ნებართვის გარეშე მათ ნუ გადაიღებთ.
როდის შეიძლება თვითმფრინავის რეჟიმის გამორთვა?
დაშვების შემდეგ, როცა ეკიპაჟი ამას გამოაცხადებს, ჩვეულებრივ, ასაფრენი ბილიკიდან გასვლისას. ფრენის ეტიკეტის სხვა წესებს აქ ნახავთ: თვითმფრინავის ეტიკეტი.
